న్యూఢిల్లీ, జులై 28: హైడ్రా (HYDRA) పనులు ఎట్టి పరిస్థితుల్లోనూ కొనసాగుతాయని తెలంగాణ ముఖ్యమంత్రి రేవంత్ రెడ్డి స్పష్టం చేశారు. ఢిల్లీ పర్యటనలో భాగంగా మంగళవారం మీడియాతో మాట్లాడిన ఆయన, ప్రభుత్వ భూములు, చెరువులు, కుంటలను ఆక్రమించిన వారిపై కఠిన చర్యలు తప్పవని తెలిపారు.

కబ్జాదారులు హైడ్రాను వ్యతిరేకిస్తున్నారని పేర్కొన్న సీఎం, ఆక్రమణలు చేసిన వారు పెద్దవారైనా, పేదవారైనా చట్టం ముందు అందరూ సమానమేనని అన్నారు. గండిపేట బతుకమ్మ కుంటలు, ఎన్ కన్వెన్షన్ వంటి ఆక్రమణలను ప్రస్తావిస్తూ విపక్షాల విమర్శలను తిప్పికొట్టారు.

హైడ్రా ప్రభుత్వం తీసుకొచ్చిన అత్యంత కీలక సంస్కరణల్లో ఒకటని పేర్కొన్న సీఎం, హైడ్రా కమిషనర్‌గా ఎవరిని నియమించాలన్నది ప్రభుత్వ విచక్షణాధికారమని స్పష్టం చేశారు. మాజీ ఐఏఎస్ అధికారి సోమేశ్ కుమార్‌పై వందలాది కోర్టు ధిక్కరణ కేసులు ఉన్నాయని పేర్కొంటూ, కొందరు ఉద్దేశపూర్వకంగానే కోర్టును తప్పుదోవ పట్టించేందుకు ప్రయత్నిస్తున్నారని ఆరోపించారు. హైకోర్టు తీర్పును పూర్తిగా అధ్యయనం చేసిన తర్వాత తదుపరి చర్యలు తీసుకుంటామని తెలిపారు.

హైడ్రాపై సోషల్ మీడియాలో డబ్బులు ఖర్చు చేసి తప్పుడు ప్రచారం చేస్తున్నారని ఆరోపించిన సీఎం, కబ్జాదారులకు మీడియా సహకరించవద్దని విజ్ఞప్తి చేశారు.

విద్యా వ్యవస్థపై మాట్లాడుతూ, ఆఫ్‌లైన్ పరీక్షల నిర్వహణ వల్లే ఎక్కువ సమస్యలు వస్తున్నాయని పేర్కొన్నారు. పరీక్షల్లో అక్రమాలకు పాల్పడిన వారిపై కఠిన చర్యలు తీసుకోవాలని కేంద్రాన్ని కోరారు. విద్య రాష్ట్రాల పరిధిలోనే ఉండాలని, విశ్వవిద్యాలయాలపై కేంద్రం అధిపత్యం చెలాయించకూడదని అభిప్రాయపడ్డారు. తెలంగాణలో పబ్లిక్ సర్వీస్ కమిషన్‌ను ప్రక్షాళన చేసి పారదర్శకంగా నియామకాలు చేపట్టామని తెలిపారు.

అంతకుముందు కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహాన్తో సమావేశమైన సీఎం రేవంత్ రెడ్డి, ప్రధాన మంత్రి ఆవాస్ యోజన (PMAY) కింద తెలంగాణకు 11.56 లక్షల ఇళ్లను కేటాయించాలని విజ్ఞప్తి చేశారు. అలాగే గ్రామీణాభివృద్ధి, ఉపాధి హామీ పథకాలకు సంబంధించి పలు ప్రతిపాదనలను కేంద్రం ముందుంచారు.