న్యూఢిల్లీ, జులై 28: దేశవ్యాప్తంగా పరీక్షల పేపర్ లీక్‌లను అరికట్టేందుకు కేంద్ర ప్రభుత్వం తీసుకొచ్చిన యాంటీ పేపర్ లీక్ బిల్లు దేశ చరిత్రలోనే ఒక కీలక సంస్కరణగా నిలుస్తుందని కేంద్ర మంత్రి జితేంద్ర సింగ్ అన్నారు. మంగళవారం లోక్‌సభలో బిల్లుపై జరిగిన చర్చ సందర్భంగా ఆయన మాట్లాడుతూ, విద్యార్థుల భవిష్యత్‌ను రక్షించడమే ఈ చట్టం ప్రధాన లక్ష్యమని స్పష్టం చేశారు.

దేశంలోని పలు ప్రాంతాల్లో గతంలో పేపర్ లీక్‌లు చోటుచేసుకున్నాయని పేర్కొన్న మంత్రి, కాంగ్రెస్ పాలనలో కూడా ఆర్‌ఆర్‌బీ (RRB) సహా అనేక పరీక్షల ప్రశ్నపత్రాలు లీక్ అయ్యాయని ఆరోపించారు. పరీక్షల నిర్వహణలో సంస్కరణలను కాంగ్రెస్ వ్యతిరేకించిందని, 2010లో నేషనల్ టెస్టింగ్ ఏజెన్సీ (NTA) ఏర్పాటు ప్రతిపాదనను కూడా పట్టించుకోలేదని విమర్శించారు.

ఇటీవల నీట్ (NEET) ప్రశ్నపత్రం లీక్ ఘటన అనంతరం పరీక్షల వ్యవస్థలో సంస్కరణలు తీసుకురావాలనే డిమాండ్ దేశవ్యాప్తంగా పెరిగింది. ఈ నేపథ్యంలో పేపర్ లీక్‌లకు పాల్పడే వారిపై కఠిన చర్యలు తీసుకునేందుకు కేంద్ర ప్రభుత్వం 2024 ప్రవేశ పరీక్షల చట్ట సవరణ బిల్లును లోక్‌సభలో ప్రవేశపెట్టింది.

అయితే ఈ బిల్లును ప్రతిపక్షాలు తీవ్రంగా వ్యతిరేకిస్తున్నాయి. పేపర్ లీక్‌లను పూర్తిగా అరికట్టేందుకు ఈ బిల్లులో తగిన చర్యలు లేవని, పైపై మార్పులకే పరిమితమైందని విమర్శిస్తున్నాయి. ఈ బిల్లుపై పార్లమెంట్‌లో అధికార, ప్రతిపక్షాల మధ్య తీవ్ర చర్చ కొనసాగుతోంది.