టోక్యో, జులై 28: జపాన్‌ను మరోసారి భారీ భూకంపం కుదిపేసింది. దేశంలోని దక్షిణ కుమామోటో ప్రిఫెక్చర్‌లో మంగళవారం 7.1 తీవ్రతతో భూ ప్రకంపనలు సంభవించినట్లు Japan Meteorological Agency (జేఎంఏ) వెల్లడించింది. భూకంపం అనంతరం సముద్రంలో సుమారు 3.28 అడుగుల ఎత్తైన అలలు వచ్చే అవకాశం ఉందని హెచ్చరిస్తూ సునామీ అలర్ట్ జారీ చేసింది.

భూకంపం ప్రభావంతో దక్షిణ క్యుషు ద్వీపంలోని కుమామోటో, నాగసాకి, కగోషిమా, ఫుక్యోకా, సాగా, ఓయిటా, మియాజాకి ప్రిఫెక్చర్‌లలో అత్యవసర భూకంప హెచ్చరికలు అమల్లోకి వచ్చాయి. ప్రజలు అప్రమత్తంగా ఉండాలని ప్రభుత్వం సూచించింది.

భద్రతా చర్యల్లో భాగంగా హై-స్పీడ్ షింకన్సెన్ రైళ్లతో పాటు పలు రైలు సర్వీసులను నిలిపివేసినట్లు రైల్వే ఆపరేటర్ వెల్లడించింది. మరోవైపు, సెందై, జెన్‌కై అణు విద్యుత్ కేంద్రాలకు భూకంపం వల్ల ఎలాంటి ముప్పు వాటిల్లలేదని క్యుషు ఎలక్ట్రిక్ పవర్ సంస్థ స్పష్టం చేసింది.

భూకంపం సంభవించిన సమయంలో భవనాలు ఒక్కసారిగా కంపించడంతో స్థానికులు తీవ్ర భయాందోళనకు గురయ్యారు. పలువురు ఇళ్ల నుంచి బయటకు పరుగులు తీశారు. ప్రాణ, ఆస్తి నష్టంపై అధికారులు ఇంకా పూర్తి వివరాలు వెల్లడించలేదు.

ప్రపంచంలో అత్యధికంగా భూకంపాలు సంభవించే దేశాల్లో జపాన్ ఒకటి. దేశం "రింగ్ ఆఫ్ ఫైర్" ప్రాంతంలో ఉండటంతో తరచూ భూకంపాలు నమోదవుతుంటాయి. ప్రపంచవ్యాప్తంగా 6.0 లేదా అంతకంటే ఎక్కువ తీవ్రతతో సంభవించే భూకంపాల్లో గణనీయమైన శాతం జపాన్‌లోనే నమోదవుతున్నాయి.